Omenatge a Andriu Lagarda

Omenatge a Andrèu Lagarda

Òu ! l’Òme,

Aital èra l’expression amistosa qu’emplegava l’Enric Mouly dins las correspondéncias amb lo Joan Bodon.

Uèi, dins l’encastre d’aquela « Jornada Occitana en Volvèstre » podèm tornar reprene, de segur, lo meteis biais de far e demandar :

  Alavètz l’Òme, que devenguètz ? Poriatz me respondre , segurament,«  e bé » figuratz-vos que soi a contunhar de trabalhar coma de costuma ! Contunhi de demorar curiós de tot que se debana dins lo mitan occitan e doncas soi a escriure e publicar encara, encara !

Vertat qu’avètz, ja, recampat tant e tant de contes e racontes,proverbes,tradusit tanben, que la tièra es devenguda un ramelet d’òbras ont cadun, jove o mens jove pòt anar furgar deliciósament.

Car Amic, sètz un passaire, e sustot un desrevelhaire de consciénca a prepaus de la lenga que cal manténer.

A nos autres de sègre lo vòstre exemple.

Mercé encara e que la santat vos acompanhe per lo melhor que se pòsca.

Per la còla dels organizators-triz de la Jornada Occitana en Volvèstre,

Miquèl Mauré

Montbrun –Boscatge, Dissabte 25 de Genièr de 2025

------------------------------------------------------------------------------------

Omentage a Andrieu LAGARDE

-----------------

Andrieu, Renée,

Vau ensajar de pas èster tròp long . Vòli simplament vos díser mercès plan per totas las accions menadas, pel vòstre trabalh acomplit per que l’occitan torne trobar sa dignitat, e aja sa plaça dins l’escòla de la Republica que l’a enebida e tant mespresada, per que la lenga de la vida vidanta de nòstres parents, de nòstres grands, tant a Rivèl qu’à Montbrun siá pas mès aperada patoès, mès occitan ! Mercès plan per las accions menadas tot le long de vòstra longa e rica vida , per que l’occitan sia totjorn lenga viva.

E se pòt díser qu’avètz capitat: ara l’occitan es lenga d’ensenhament e lenga ensenhaira de la mairala a la facultat. Les 2 Matèu, Emilia e Aureliaque cantaràn tot ara ne son de polits exemples.

Les elèvas de las seccions bilingüas, de las calandretas, dels collègis, dels licèus e de las facultats amb lors professors respectius son un pòc vòstres hilhs e hilhas, vòstres eiritièrs ièras e continuan vòstra mission qu’es sovent una batèsta.

Au nivèu personau vos vòli mercejar de m’aver acompanhat pendent 50 ans :

• Tre la debuta de ma carrièra de regent a Lagardèla de Lèsa a la debuta de las annadas 70 coma conselhièr pedagogic d’occitan amb la mesa a disposición d’un utís pedagogic que me servirà longtemps:”Per començar l’occitan a l’escòla” amb la caisheta de comptinas, cançons, provèrbis e las règlas de basa per ecríver l’occitan e tanben a l’escasença de jornadas de formación pedagogicas

• Pendent les estagis d’aprendissatge d’occitan a l’EOE, escòla Occitana d’Estiu a Vilanòva d’Òlt

• A la debuta de las annadas 80, en 83 exactament a l’acamp de creación de l’associacion de l’escòla Calandreta del Païs Murethin que festejarà ongan sos 40 ans

• En 2004 a Murèth pendent la prumèra participacion a la dictada occitana de la Calandreta e del cèrcle occitan carbonés e del Volvèstre. La vòstra presencia e participación s’es hèita sens relambi dempuèi tant a Carbona, plan solide, qu’a Sent Lis e ara a MONTBRUN BOSCATGE

Au mes de junh passat, per le Total Festum consacrat a la joena creacion occitana, Miquèl Feltin-Pallas director de l’Express, balhèt una conferencia a Montbrun a prepaus de la publicacion de son darrèr libre “Comment sauver les langues regionales?” Me pensi qu’avètz portat un fum de responsas e de solucions que caldriá expandir, generalizar e balhar, enfin, un estatut de co-officialitat a l’occitan. Benlèu qu’amb un prumèr ministre occitan bearnés…

Grand mercès tanben a vòstra hemna Renée Lagarda, qu’es a vòstre costat dempuèi 70 ans e que, me pensi, vos a sostengut encoratjat per continuar d’avançar e de vos balhar le vam necessari au servici de nòstra lenga millenària

Amb un pòc d’avança, au nom de tota la còla d’irreductibles occitans montbruneses, au nom del CA de l’Ostau de Montbrun vos desiri un plan bon anniversari. Le 27 de mai venent aurètz 100 ans. Bona hèsta. Plan bona santat a totis dus . E au plaser de vos véser encara longtemps dins las activitats, hèstas occitanas del Volvèstre

Totjorn au nom de tota l’equipa avèm le grand plaser de vos ofrir modèstament un ramelet e un panèr de produits locaux preparats per las collègas.

Mercès d’èster venguts a Montbrun partejar un momenton de la jornada amb nosautres

Frederic SOUQUE