Overblog Suivre ce blog
Editer l'article Administration Créer mon blog
21 octobre 2013 1 21 /10 /octobre /2013 00:35

 

Tres jorns de hèsta a Sent Lis – Minjacebas.

 

2013Pichonscantan

 

Dempèi 19 ans, la hèsta anuala de la Catinon es devengut le rendètz-vos de la cultura occitana mès popular e mès hestiu deu País Tolosan. Cau díser que dempèi la siva creacion, a la Liberacion, la Catinon devenguèc suu pic un personatge prumèr deu burlesc occitan. Ambe le siu ríser, las sivas grimaças, le siu accent, e las analisis de la vida vidanta plena de realitats… La Catinon s’imposèc pauc a paic coma l’una de la hemna remercablas deu segle XX en Occitània. Maugrat la disparicion deu siu creator Carles Molin en 2009, le succès de la Catinon dèisha pas de créisher. Sufís pas que véser l’escaijuda incontestabla d’aqueres tres jorn de hèsta qu’amassèren mès de 1300 personas de tots les atges.

 2013poupinet

L’un deus moments deus fòrts estèc l’acuèlh per la Catinon  (hèita per Miquèu Sent Ramon) deus 150 escolans de las classas bilinguas francés/ occitan. Emocion de las bèlas quand les « Pichons », davant les lors mairs e pairs e les amics de la Catinon cantèren amassas le  Se Canta  e L’Immortèla , vertadèrs imnes occitans. Ende comprénguer la fòrça d’aquera estona, sufís de doblidar pasle combat menat en 2002 per la municipalitat de l’epòca, de l’associacion País de Catinon e de Carles Molin ende draubir a Sent Lis, a l’escòla publica, la prumèra vertadèra classa bilingua deu departament.

 2013sur scène

Ende hestejar coma cau aqueth succès, la Catinon convidèc les 300 personnes deu public a tastar la còca de cebas de Minjacebas e se levar le veire de l’amistat.

2013PichonsDançan

 

Ende se cabussar dins l’ambient cau quauques passes de dança que les mainatges aprenguèren de Joan-Francés Capon. Les pichons de las escòlas podèren, le divendres, hèr bèlas danças tradicionalas.

Isopet2

 

Atau dròlles e ensenhaires inicièren aus parents a dançar ambe l’ajuda deu musician deus tarribles, Manu Isopet.

2013AlidéSansCatinou

 

Après mès de 220  repaishes de servits, hèits de sopa de cebas, de saussissa ambe mongetada, estèc le torn de la joenessa ambe le talentuosa Alidé Sans, una cantaira de 20 ans, venguda de la Val d’Aran vesina on, ac cau díser, l’occitan a l’estatut de lenga oficiala. Podètz véser un tròç deu concèrt en clicar aicí : cançon Mònstres, cançon Es Caulets.

 

 

2013MèssaCatinou

 

Le dimenge, la polida e vasta  glèisa de Sent Lis èra tot juste pro bèla ende recéber 300 fisèus venguts escotar la mèssa occitana de l’abat Passerat, las votzes de la corala de Legavin, sense doblidar Claudi Roméro que se hè plorar la boha e plenha le bèl espaci de la nau deu son poderós de la bodega. Mès çò que hè tanbens l’originalitat d’aquera celebracion es la preséncia de Loís Bonzòm, 93 ans, natiu de l’Èrm, còsta Minjacebas, darrèr autentic garda soïsse de França tota, avent la letra d’acreditacion hèita per las autoritats religiosas. Vestit deu siu costume de granda ceremonia roge brocat d’aur hèit en 1843, es a eth, en la siva qualitat de garda soïsse, de hèr les remerciaments d’usatge a la fin de l’ofici e avant la distribucion deu pan d’anís benasit mentre que le public dèisga la glèisa en cantant cants occitans celèbres.

 2013Taulejada

Ende parlar de la taulejada de la Catinon, estèc le parat de tastar le tradicionau hitge gras e la pora farcida de l’aprestaire Francés Arlet, sense doblidar le riquiquí auferit peu Jacotin.

2013Alranq

 

Es Claudi Alranq, grand professionau deu teatre d’òc, que venguèc ambe talent, mos hè s’esclacassar ambe una seria de comediòtas suu rugbi. Endeu bonur deu 250 convidats tornèc la classica comediòta « La partida de Rugbi » deu nòste praube Pirolet.

 

 

Ende hestar coma cau le 70n aniversari de la Catinon, tota l’equipa deus benevòles de l’associacion País de Catinon vos dona rendètz-vos les 3, 4 e 5 d’octòbre de 2014 a Sent Lis / Minjacebas end’un programa deus tarribles.

           

 

Autes contactes. oeb : https://www.facebook.com/catinou.paisdecatinou - @ : paisdecatinou@voila.fr Tlf : 06 86 89 23 61 Adreça postala : País de Catinon, mairia, plaça nacionala, 31470 Sent Lis.

 

 

Fòtos d'Elodia Estéban e de Patric La Seuva. 

 

Partager cet article

Repost 0
Published by Nicolau Rei Bèthvéder
commenter cet article

commentaires

Presentacion / Présentation

  • : País de Catinou (Saint-Lys / Sent Lis)
  • País de Catinou (Saint-Lys / Sent Lis)
  • : Site de l'association pour l'occitan à Saint-Lys / Siti de l'associacion ende l'occitan a Sent Lis
  • Contact

Recèrca / Recherche